A Galería de Arte Pilar Franco presenta 'Miradas Emerxentes', a nova exposición da artista, que se inaugura en Sanxenxo o 2 de agosto baixo invitación e poderá visitarse até o 6 de setembro na súa Galería de Arte situada de Luís Vidal Rocha, 9.
Un percorrido sensorial e artístico que nos convida a mirar, e a mirarnos, desde outras ópticas, "é unha experiencia viva".
Segundo a artista, "cada obra fálanos desde o profundo, coma se o lenzo fose un espello da alma ou unha paisaxe interior en constante transformación. Tonalidades, texturas e trazos proponnos unha viaxe cara á esencia, un camiño de emocións, preguntas, revelacións e renacementos".
A exposición reúne unha selección inédita de pinturas que Pilar Franco creou inspirada pola súa chegada a Sanxenxo, pola conexión co mar, a natureza e pola necesidade de explorar novas formas de comprender a arte, a vida e o misterio do humano.
A artista galega convida ao visitante a observar o mundo con outros ollos, a deterse e habitar o momento desde unha mirada máis íntima e auténtica.
"Cada pintura é unha invitación a mirar cara a dentro, a escoitar, a sentir... A comprender que tamén habitamos paisaxes invisibles para a mirada cotiá, que se poden revelar abrindo a porta ao extraordinario, ao diferente, ao que emerxe como nova expresión", explica Pilar Franco.
Miradas Emerxentes poderá visitarse os xoves, venres e sábados de 19:30 a 22:00 horas.
A galería, coa súa proposta expositiva innovadora e sensible, preséntase como un novo polo cultural no corazón das Rías Baixas.