Despois dun verán protagonizado pola 32ª Bienal de Arte de Pontevedra, a Deputación presenta unha completa axenda outonal no Museo de Pontevedra que se estenderá até o 21 de decembro. Exposicións, obradoiros, cursos, concertos, seminarios e conferencias conforman unha proposta diversa pensada para todo tipo de públicos.
Un dos pratos fortes desta tempada será o IV Encontro de Museología ICOM-España, que por primeira vez celebrarase en Galicia. Baixo o título "Coleccións almacenadas: (re)definir e (re)organizar. O desafío da sustentabilidade medioambiental e social", este encontro reunirá do 16 ao 18 de outubro a representantes de grandes museos europeos, como o Louvre, o Museo Nacional de Escultura, as Coleccións Reais, o Museo Nacional Suízo ou o Museo de Historia Natural de Berlín, entre outros. As inscricións están abertas até o 10 de outubro.
Ademais, esta cita marcará o eixo dun ambicioso programa de seminarios, entre os que tamén destaca a 14ª edición do Encontro de Conservación e Restauración, que terá lugar os días 20 e 21 de novembro. Este ano, centrarase no uso do cal no patrimonio cultural e as técnicas de conservación asociadas.
O primeiro seminario desta tempada celebrarase do xoves 26 ao sábado 28 de setembro na UNED de Pontevedra e servirá de peche para a Bienal. Titulado "Volver ser humanos", contará con relatorios de destacadas figuras internacionais do pensamento, a arte e a crítica.
Entre as propostas divulgativas tamén destacan a conferencia do colectivo A Rula, o 9 de outubro, polo Día Europeo da arte Rupestre, e as charlas sobre a colección do museo que ofrecerá o grupo de investigación Iacobus en decembro.
EXPOSICIÓNS
No apartado expositivo, o 24 de outubro inaugurarase unha mostra dedicada ao dramaturgo pontevedrés José Ruibal, en conmemoración do centenario do seu nacemento. Comisariada por Xosé Enrique Acuña, a exposición repasará a súa vida e obra, especialmente o seu legado no teatro de vangarda, que alcanzou un gran recoñecemento en Estados Unidos. A proposta completarase cun seminario (11 de novembro) e un espectáculo poético-teatral (13 de novembro).
Pouco despois, abrirase tamén unha mostra sobre o pintor Leopoldo Varela (O Porriño, 1927 – Vigo, 2007), comisariada por Beatriz de San Ildefonso, que repasará a súa traxectoria pictórica, marcada pola procura da cor sen perder o contacto co real.
Preto das festas do Nadal chegará a exposición "Debuxar coa luz", que explorará a historia da fotografía en Pontevedra durante o século XIX. As comisarias son Cristina Echave e Reis Camina.
E até o 30 de novembro, aínda se pode visitar a instalación "Dalia", de Marta Pazos, unha intervención artística dentro do ciclo Infiltracións, comisariado por Iñaki Martínez Antelo.
OBRADOIROS, CURSOS E MÚSICA
A programación inclúe tamén unha ampla oferta de actividades culturais. Para o público adulto, en outubro comezarán obradoiros de cerámica inspirados no centenario de Cerámica Celta, nacida en Pontecesures en 1925. Tamén se impartirá un curso de historia, arte e moda, a cargo de Carolina Munáiz.
Para o público escolar, organízanse talleres polo Día Europeo da arte Rupestre, concertos do cuarteto de frautas traveseras DeBiselas e actividades escénico-musicais ao redor de Castelao, coa compañía Migallas Teatro.
No ámbito musical, destacan dous concertos abertos ao público: o 15 de novembro, un recital para recuperar obras para piano do compositor galego Xoán Montes, e o 22 de novembro, a actuación do conxunto de música contemporánea Lucus Ensemble.
Como cada novembro, o museo celebrará a Semana Lorquiana, organizada por Polo Correo do Vento. Este ano, terá un carácter especial debido ao recente falecemento de Carlos Taboada, un dos fundadores do proxecto. Ademais de lembrar o paso de Federico García Lorca por Pontevedra, será tamén unha oportunidade para render homenaxe ao debuxante, escritor e activista cultural pontevedrés.