Este vindeiro sábado, 12 de xullo, dúas das bandas do momento de música en galego, The Rapants e Rebeliom do Inframundo, actuarán de balde en Soutomaior.
Forman parte dos bautizados como 'Concertos de Verán' de Soutomaior e celebraranse no peirao de Arcade.
Os ‘Concertos de Verán’ comezarán ás 21:30 horas cunha sesión DJ de La Duendeneta.
Ás 22:00 horas dará inicio o concerto de The Rapants, grupo orixinario de Muros que esta mesma semana encheu a explanada da Cidade da Cultura, en Santiago de Compostela.
Ás 00:00 horas será a quenda do grupo vigués Rebeliom do Inframundo, con máis de 10 anos de experiencia e un habitual do panorama festivaleiro de Galicia.
O recinto dos concertos incorpora unha zona gastro para que as persoas asistentes poidan comer e beber sen ter que desprazarse do lugar das actuacións; así como unha serie de actividades complementarias que terán lugar durante o transcurso dos concertos.
O alcalde de Soutomaior, Manu Lourenzo, sinalou que estes concertos son "unha nova mostra da aposta que fai o goberno local pola promoción e difusión de galego en todos os ámbitos" e demostran que "este goberno programa para os públicos de todas as idades e que ten en conta todos os gustos".
Lourenzo destaca que ter unha axenda de actividades "tan completa e extensa" como a de Soutomaior ao tempo que realizan "a maior cantidade de investimentos da historia" do concello é posible grazas a unha xestión económica que "rompe todas as previsións e que nos permite destinar os cartos dos nosos veciños e veciñas a mellorar a súa calidade de vida e que poidan desfrutar do mellor concello e dos mellores barrios posibles”.