Pontevedra prepárase para unha nova fase cultural coa confirmación de que o histórico convento de Santa Clara será o escenario que acolla a Bienal de Artes Vivas en xullo de 2026.
A Deputación de Pontevedra presentou este mércores, 17 de decembro, na propia igrexa do convento, os detalles dun proxecto que pretende potenciar a cidade como referente da creación contemporánea, integrando o patrimonio coa vangarda artística.
Rafa Domínguez, vicepresidente da Deputación, e Iñaki Martínez Antelo, comisario da primeira edición, destacaron a relevancia desta iniciativa que se conformará como un "festival" artístico durante arredor de dúas semanas con actividades diarias.
Domínguez subliñou que Santa Clara representa un "escenario que simboliza a nova etapa cultural que construímos desde a Deputación". Para o vicepresidente, o convento é "un lugar de transformación" que se abre agora como "un dos grandes proxectos museísticos de España" e a "sede cultural do futuro".
Lembrou tamén que este proceso ten a súa base no convenio que permitiu a cesión do convento por parte do Concello á Deputación, superando "moitas incertezas, ao principio xurídicas, e o risco dalgunhas pezas", reclamando sempre a súa protección porque "Santa Clara non é un edificio máis e non pode quedar en mans da improvisación".
A Deputación vincula este novo pulo de Santa Clara coa exitosa recuperación da Bienal de Arte de Pontevedra en 2025, que atraeu a máis de 125.000 visitantes e foi recoñecida co Premio Cultura Galega.
Domínguez adiantou que "á volta de Nadal falaremos sobre Santa Clara" en referencia ás obras no recinto conventual e que nos próximos días se abrirá o concurso público para escoller o comisariado da Bienal de 2027.
O obxectivo desta nova proposta é que a Bienal "deixe de ser un elemento illado", converténdose nunha "cita que reúne artes plásticas e vivas con presenza constante na cidade". A Bienal celebrarase cada dous anos, pero no interludio consolidarase un evento de artes vivas na cidade, "activando Santa Clara como escenario único".
Iñaki Martínez Antelo explicou que as Artes Vivas, que este ano 2025 se converteron nun evento paralelo dentro da Bienal de Arte con actividades cada venres en distintos puntos da cidade e provincia, agora, en 2026, empregará o espazo de Santa Clara, incluída a súa igrexa.
"Estamos na fase de convidar artistas para ver que espazo se adecúa mellor para artes vivas", afirmou sen querer adiantar nomes dos creadores que visitarán a cidade.
O proxecto busca acoller "prácticas artísticas contemporáneas, coa implicación do artista co público", incluíndo "arte de acción, artes escénicas máis experimentais, incluso circo".
O comisario engadiu que os artistas convidados están "encantadísimos en utilizar un espazo coma este" e que haberá "máis presenza internacional, con artistas que se presentarán en España por primeira vez".
Os nomes dos artistas anunciaranse "nuns meses", e todas as actividades serán "gratuitas, como se entende a Cultura desde o Museo de Pontevedra e desde a Deputación".
Martínez Antelo engadiu que esta Bienal, inspirada en modelos como os de Venecia ou Lyon, terá un formato distinto: "dúas semanas e será unha especie de festival con todas as actividades".
Rafa Domínguez tamén abordou a necesidade de "compatibilizar os espazos para estas actuacións cos traballos que se van facer en breve" neste recinto, mencionando problemas de goteiras nos que xa se actuou.
O obxectivo é que "entre Bienal e Bienal non quedara un ano baleiro", fomentando a idea de manter o pulso cultural na cidade.