"Eu sempre digo que as novelas non teñen que ser reais, pero si verosímiles" comenta a xornalista e escritora Marta Robles no podcast 'Cara a cara' para falar da súa última novela 'Amada Carlota'.
Esa verosimilitud fai que este libro se nutra de nomes como os de Jean Pierre Bourbon, o barón Thyssen, Nina Dyer, Nicolás Franco, Ramón de Rato, Mercedes de Grass, Rafi Escobedo, Kichi, Cuca Gamarra,... e un longo etcétera xunto a "espazos reais que os propios lectores poidan recoñecer".
Con eles, dous protagonistas xa presentes en novelas anteriores de Robles. O ex reporteiro de guerra reconvertido en detective privado, Tony Roures e a xuíza Carlota Aguado que asume un papel principal nesta novela negra.
"A estrutura desta novela non é a clásica da novela negra, é unha estrutura máis de suspense que de intriga, un pouco ao estilo Hitchcock, con ese grao de anticipación que fai que moitas veces o propio lector queira advertir ao protagonista", precisa a escritora.
Concretando: "Carlota Aguado descobre de mantera fortuíta que a súa filla, da que a separaron ao pouco de nacer, podería ser unha moza da súa contorna. Para certificalo encarga a Roures, con quen mantén unha relación sentimental salpicada por unha recente infidelidade da xuíza, que pescude a verdadeira identidade da moza".
Ten unha lectura por momentos moi dura e así o ratifica Marta Robles polo retorno que lle fai chegar o público lector: "hai algúns lectores que me dixeron que se tiveron que parar e volver continuar despois, pero sen poder deixar de ter na cabeza o que pasaba".
E esa crueza da trama vén dada pola propia realidade "ten que ver con bebés roubados, con abusos sexuais a adolescentes, con abusos sexuais ás mulleres en xeral e, sobre todo, cos silencios das mulleres ao longo da historia", engade.