O Concello de Marín mantén a súa aposta pola creación literaria en galego coa convocatoria do XXIII Premio de Poesía, enmarcado na celebración do Día dás Letras Galegas.
Este mércores foron presentadas as bases para poder participar, onde se indica que poderán facelo persoas maiores de 18 anos de calquera nacionalidade.
Os traballos deberán estar escritos en lingua galega, ser completamente orixinais e ter unha extensión mínima de 100 versos, xa sexa nun poema ou en varios. A temática é libre.
Valoraranse especialmente a orixinalidade no tratamento do tema, a riqueza da linguaxe e do estilo, así como o rigor e a calidade literaria.
As obras deberán entregarse en formato A4, a dobre espazo, con letra Times New Roman tamaño 12 e paginadas, sen que o nome da persoa autora figure no texto.
O premio conta cunha dotación económica de 1.000 euros para a obra gañadora e contempla ademais un accésit de 200 euros para un traballo que, sen obter o primeiro premio, reúna méritos suficientes para ser destacado.
O galardón é único e indivisible e non implica a perda dos dereitos de autor. O Concello, en todo caso, resérvase o dereito de publicar total ou parcialmente a obra premiada.
O prazo de presentación permanecerá aberto desde o venres 20 de marzo até o 4 de maio ás 14:00 horas.
A presentación seguirá o sistema de plica, mediante dous sobres diferenciados. Un conterá a obra, preferiblemente en soporte dixital (USB) identificado co título e o pseudónimo, e outro cos datos persoais, que incluirá o formulario oficial, copia do DNI, dirección, teléfono, correo electrónico, breve currículo e as declaracións responsables sobre autoría, orixinalidade e protección de datos.
O xurado estará formado por persoas de relevancia no ámbito da cultura e a literatura galegas. A Secretaría exerceraa a directora da Biblioteca Municipal Vidal Pazos.
O fallo, que será inapelable e poderá declarar deserto o premio se non se alcanza o nivel requirido, farase público o 14 de maio a través das canles oficiais do Concello.
A entrega do galardón terá lugar no acto institucional de celebración do Día dás Letras Galegas en Marín. Tanto a persoa gañadora como quen reciba o accésit comprométense a acudir á vila para recoller o premio e realizar a lectura da súa obra.
As bases completas do XXIII Premio de Poesía Concello de Marín poden consultarse na páxina web municipal, na sede electrónica, no taboleiro de anuncios e a través das redes sociais do Concello.
Para calquera outra dúbida, as persoas interesadas poden dirixirse ao correo [email protected].