A facultade de Belas Artes de Pontevedra inaugurou este mércores na Sala O Abrigo a exposición "Un Abrigo Propio"
A iniciativa, promovida polo colectivo estudantil Luscofusco, toma como referencia o ensaio de Virginia Woolf para reunir as propostas plásticas de quince alumnas do grao.
A mostra explora a creación dun espazo, tanto físico como simbólico, reservado á muller, en relación á conmemoración do 8M.
O proxecto integra obras de pintura, fotografía e escultura asinadas por Ana Piñeiro, Aroa González, Creep, Dana Latorraca, Guadalupe Díez, Loreña Añón, Marina Saavedra, Mencía Fana, Noa Fontán, Paula Romay, Rain Ramos, Sara Ricoy, Sofía Saraiba, Victoria Rodríguez e Nila.
Esta exposición permanecerá aberta ao público ata o mércores 18 de marzo e servirá de marco para a realización dun obradoiro de poesía e diversos encontros con profesionais do sector artístico.
OUTRAS ACTIVIDADES NO CAMPUS
A programación cultural do centro completarase a vindeira semana co evento "Folk e Xuventude: Sons de Galiza, Valencia e Castela".
A actividade, organizada polos estudantes William Evans Vinuesa e Sandra Sánchez Díaz co apoio da Universidade de Vigo e o Concello de Pontevedra, busca analizar a realidade actual das músicas de raíz desde a perspectiva das xeracións novas.
O calendario de actos comezará o xoves 12 de marzo ás 18:00 horas cun obradoiro de baile tradicional galego na propia Sala O Abrigo, dirixido por Manuel González Meijide. A entrada será libre ata completar a capacidade do recinto.
O venres 13 a actividade trasladarase á sede da Vicerreitoría do Campus.
A partir das 16:00 horas, desenvolverase un ciclo de conversas sobre a música tradicional que contará coas achegas de Noelia Villaverde e Manuel González Meijide por parte de Galicia, Laura Silva en representación de Castela e Carlos Emilio Asensio desde Valencia.