O Museo de Pontevedra despide esta Semana Santa dúas exposicións temporais: "Debuxar coa luz. A fotografía en Pontevedra no século XIX" e "San Sebastián, corpo de beleza e dor. Unha paixón privada", que se despedirán tras o período festivo.
Durante esta semana especial, o Museo adapta os seus horarios e abrirá de 10:00 a 21:00 horas o martes, mércores e sábado, mentres que o Xoves Santo, o Venres Santo e o domingo poderá visitarse en horario de mañá, de 11:00 a 14:00 horas.
A exposición "Debuxar coa luz" propón unha viaxe ao pasado a través de arredor de 300 imaxes, moitas delas orixinais do século XIX, acompañadas por máis dun cento de obxectos e pezas de mobiliario.
A mostra reconstrúe o labor dos primeiros fotógrafos que comezaron a captar a vida en Pontevedra cando a fotografía daba os seus primeiros pasos. Retratos e escenas urbanas conviven cun achegamento ao uso científico e documental da imaxe, así como á expansión das revistas ilustradas.
Pola súa banda, "San Sebastián, corpo de beleza e dor. Unha paixón privada" ofrece un percorrido artístico e simbólico arredor desta figura, a través de 77 gravados que abranguen desde o Renacemento ata o século XX.
A exposición destaca especialmente pola presenza de obra barroca dos séculos XVII e XVIII.
Ademais, a programación do museo durante estas datas inclúe actividades para o público máis novo.
Os días 31 de marzo e 1 de abril celebraranse obradoiros infantís, xa con todas as prazas cubertas, nos que a ilustradora Chus Rojo guiará aos participantes na creación dun caderno botánico.
A través da observación de obras do museo e de flores reais, os nenos explorarán a representación artística da natureza, aprendendo a identificar e debuxar especies da contorna cun enfoque creativo.