As Rías Baixas estarán ben representadas nos premios Iberian Festival Awards, uns galardóns que recoñecen anualmente os mellores festivais que se celebran en España e Portugal.
Dous festivais musicais, o Son Rías Baixas e o Revenidas, son finalistas na categoría de mellor festival de formato medio, mentres que a Festa do Marisco do Grove logrou entrar, por vez primeira, no abano de candidatos á mellor festa.
Os dous festivais pontevedreses conságranse así entre os dez mellores festivais deste formato da península, xunto a Noches del Botánico (Madrid), Festival Gigante (Guadalajara), Stone & Music Festival (Mérida) e outros cinco festivais de Portugal.
A Festa do Marisco, pola súa banda, comparte candidatura cunha única festa galega, o Asalto ao Castelo de Vimianzo. O resto dos nominados, desde os entroidos de Loulé e Torres Vedras á feira de São Mateus ou a Feira Nacional de Artesanato, son festividades portuguesas.
O Revenidas suma en total tres candidaturas, ao optar ao galardón tamén como mellor fotografía de festival (Christian Pérez) e mellor cobertura de vídeo (Xoán Tourís).
A actuación do dúo Galician Army no PortAmérica é finalista, pola súa banda, como mellor actuación electrónica. Non é a única candidatura para o festival de Portas, xa que tamén a Azucreira podería gañar como mellor recinto, ao que se suma a opción como mellor cobertura de vídeo (Esmerarte).
Por último, o festival Sinsal SON, que se celebra na illa de San Simón, terá catro opcións para gañar un dos Iberian Festival Awards. É finalista nas categorías de mellor promoción turística, mellor programación cultural, mellor recepción de visitantes e mellor contribución á igualdade.
Os gañadores daranse a coñecer o próximo 15 de marzo nunha gala que terá lugar na localidade portuguesa de Almancil (Portugal).