A recepción oficial ofrecida este venres pola Deputación á Sociedad Deportiva Teucro serviu para despexar, en parte, as dúbidas económicas do club pontevedrés ante o esforzo que supoñerá o retorno á máxima categoría do balonmán nacional.
Quere a directiva e o corpo técnico lograr un plantel competitivo, e para iso necesitan saber cales serán os apoios á hora de elaborar o orzamento, o que "supone una gran preocupación para el hombre que tengo a mi lado", recoñeceu o máximo dirixente teucrista, Carlos García-Alén, en relación ao adestrador do equipo, Quique Domínguez.
Por iso, o compromiso adquirido publicamente pola presidenta provincial, Carmela Silva, adquire valor para os azuis. Silva, que sinalou que o Teucro supón "un orgullo para toda Pontevedra", emprazou á directiva a unha próxima reunión "nunha ou dúas semanas" para concretar un apoio económico ao que poderá acceder a través de liña de subvencións para equipos de elite.
Á recepción acudiu, ademais de directiva e corpo técnico, gran parte do primeiro plantel teucrista, que xa empezou as súas merecidas vacacións tras unha sobresaliente tempada.