A intensidade do partido do domingo ante o Racing de Ferrol deixou secuelas físicas en varios xogadores do Pontevedra, que non participaron no primeiro adestramento semanal do equipo.
O caso que máis preocupaba era o de David Añón, que terminou o choque visiblemente afectado e dolorido por unha forte entrada do racinguista Catalá no tempo de desconto, facendo temer que podía sufrir unha lesión de gravidade.
Por fortuna, as probas ás que foi sometido o centrocampista ofensivo descartan que sufra unha rotura ou fisura no seu nocello, como se temía, polo que en principio a doenza queda nunha forte contusión, que iso si lle converte en dúbida para o próximo partido de liga do equipo no campo de Burgos. A súa prensencia no Plantío dependerá da evolución que experimente nos próximos días.
Tampouco participaron na primeira sesión da semana Jacobo Trigo, afectado dunha leve escordadura de nocello, e Dani Portela, con molestias musculares. En ambos os casos espérase que poidan incorporarse ao traballo de grupo tras a xornada de descanso deste martes e estar dispoñibles para a fin de semana.