A organización de Marín Carreiras xa abriu as inscricións para a V Carmiña Carreira e a XIII +10K Marín Manuel Rosales.
Ambas as dúas probas, xa consolidadas dentro do calendario atlético da comarca, servirán como punto de encontro para que corredores, acompañantes e visitantes poidan gozar desta festa do deporte.
Todas as persoas que queiran formalizar a súa inscrición para ambas as citas poderán facelo desde este martes a través do enlace www.emesports.es.
Desde Marín Carreiras lembran que as prazas son limitadas, polo que recomendan asegurar o seu dorsal con antelación.
Ademais, como incentivo para os atletas máis fieis, a organización puxo en marcha unha promoción especial que inclúe as dúas carreiras por 20 euros.
A Carmiña Carreira, que este ano alcanza a súa quinta edición, converteuse nunha das probas máis singulares do calendario local, combinando deporte, ambiente festivo e un percorrido pensado para corredores experimentados e populares.
O evento celebrarase o domingo 14 de xuño, con saída a partir das 10:00 horas desde a praia de Lapamán e chegada no Paseo Alcalde Antonio Blanco.
Pola súa banda, a +10K Marín Manuel Rosales, que celebrará a súa décimo terceira edición o 25 de xullo, é xa unha carreira de referencia na zona, cun percorrido esixente e atractivo que cada ano reúne a atletas de diferentes puntos de Galicia. A proba rende homenaxe a Manuel Rosales, figura moi vinculada ao deporte marinense.
Neste caso, a proba terá a súa saída na Estación de Autobuses da Avenida de Ourense. As probas escolares comezarán ás 20:30 e as de 10 e 5 quilómetros a partir das 22:00 horas.
As incripciones para a Carmiña Carreira finalizarán o mércores, 10 de xuño, ás 23:50 horas, e as da 10K Marín Manuel Rosales, o domingo, 19 de xullo ás 23:59 horas.
Desde a organización destacan ademais o atractivo da contorna de Marín, convidando aos participantes a aproveitar a xornada para descubrir a riqueza turística, gastronómica e natural do municipio e a súa contorna.