Non hai quen discuta a Alexis Viéitez no tramo da estrada de PIntos, en Marcón, por onde discorre tradicionalmente a Subida Cidade de Pontevedra de automobilismo.
O piloto da escuadra Buxa Motor Poio finalizou a primeira xornada da proba como líder, e este domingo confirmou o seu dominio sendo tamén o máis rápido nas últimas quendas da competición.
Desta forma, Viéitez suma a súa terceira vitoria consecutiva na Subida Cidade de Pontevedra e toma impulso na clasificación xeral do Campionato Galego de Montaña, onde defende título.
Segundo na clasificación xeral mantívose Jesús Pombo (Congostra Team Sanxenxo) a 4.632 segundos, mentres terceiro completando o podio final foi Jacobo Sobral (Silver Car) S2.
Consulta aquí a clasificación oficial completa da XX Subida Cidade de Pontevedra.
Espectáculo deron tamén Manuel Senra e Víctor Magariños na categoría de carrozados, sendo vencedor finalmente o primeiro deles aos mandos do seu Peugeot 306 Maxi.
Tras a proba, celebrada ao longo da mañá do domingo, a Praza de España acolleu a entrega de premios da proba automobilística organizada un ano máis pola Escudería Cidade de Pontevedra.