Preto de 150 deportistas déronse cita esta fin de semana en Marín para participar na 31 edición do Campionato de Galicia de Marcha en Ruta.
A avenida de Ourense foi o escenario onde Antía Chamosa, atleta da Sociedad Gimnástica de Pontevedra, proclamouse vencedora en categoría feminina, mentres que Roberto Vieiro, do Club Atletismo Santiago, quedou campión na masculina.
Chamosa chegou á meta cun crono de 47:08, e Carmen Escariz, do Alcampo Scorpio 71 (49:27) e Iria Rivas, do Ría Ferrol (53:32), completaron o podio en segundo e terceiro lugar respectivamente.
Pola súa banda, Vieiro impúxose cun tempo de 44:24, e seguírono Juan Manuel Morais, do Marineda Atlético (44:30), e José Fernández, do Celta (46:28).
En canto ás carreiras de categoría base, Aldara Meilán, do Atlética Lucense, foi a máis rápida das sub16, logrando o terceiro mellor tempo da xeral (26:09), mentres que Brais Suárez, do RunGalicia-InterSport, foi o vencedor da competición masculina cun tempo de 24:27.
Claudia Sufuentes, do Atlética Lucense, impúxose en categoría sub14 co terceiro mellor tempo da xeral (16:27), e Andrés González, do Celta, foi o primeiro do grupo masculino que percorreu os tres quilómetros da proba (16:12).
En sub12, Sabela Castelo, do Atletismo Vila de Cangas foi a vencedora cunha marca de 10:01, mentres que o deportista do Atletismo Porriño, Tomás Bautista, quedou segundo na xeral cun tempo de 10:57.
Na última categoría, a sub10, Zaira Pousada, do Atletismo Ría de Arousa, e José Ramón Veiga, do Atletismo Cuntis, foron os primeiros en chegar á meta cuns tempos de 7:08 e 6:37 respectivamente.