O Arosa SC mantén a súa parcela ofensiva coa renovación do seu máximo artilleiro Gabri Palmás, dianteiro moañés de 27 anos que irrompeu con forza na súa primeira tempada no conxunto arlequinado.
E é que Palmás alzouse como unha peza fundamental no equipo de Gonza Fernández tras anotar quince goles a pasada tempada, trece deles en Terceira Federación e dúas na fase autonómica da Copa Federación.
Dous deses tantos foron especialmente decisivos, pois se deron na remontada da última xornada de liga que permitiu ao conxunto vilagarcián ascender de categoría de forma épica.
O de Moaña afirma sentirse "cómodo e moi querido" en Vilagarcía e garda un gran recordo por todo o logrado nunha tempada brillante tanto no individual como no colectivo.
Pero o ascenso de categoría trae consigo novos retos e esixencias: "Vai ser unha tempada bonita e dura á vez porque o nivel dos equipos vai ser alto", afirmou Palmás.
Co inicio da pretemporada, que será en breve, o artilleiro do Arosa destaca a importancia da desconexión e da preparación individual "para volver nas mellores condicións".
Con esta renovación e a do dianteiro Adri Lombao, cuxa continuidade foi anunciada nas últimas horas, o Arosa mantén a súa aposta polas dúas referencias de ataque que levaron o equipo ao ascenso de categoría.
O club avanza na confección do plantel do equipo de Gonza Fernández.