O Arosa SC iniciou a súa pretemporada este sábado na Lomba cun triunfo por 1-0 ante o Alondras CF, no encontro clasificatorio para os cuartos de final da Copa RFEF.
O tanto decisivo chegou nada máis arrincar o enfrontamento da man dun gran Martín Diz que, no primeiro minuto, aproveitou un contragolpe para bater o gardameta visitante.
O xogador arlequinado foi o protagonista durante o inicio do choque, moi incisivo pola banda esquerda e xerando varias ocasións coas que puido ampliar a vantaxe.
O equipo dirixido por Gonza Fernández dominou con claridade os primeiros 45 minutos, despregando un xogo dinámico e ofensivo.
A ocasión máis perigosa para o empate chegou nun penalti cometido sobre Yelco, pero o porteiro local, Chema Leobalde, detivo o lanzamento mantendo a vantaxe local.
Na segunda metade, o técnico do Aroua renovou por completo o once, dando minutos a todo o plantel. O Alondras aumentou a súa presenza ofensiva, pero a defensa local e o novo gardameta, Figueroa, mantiveron o marcador a favor. Rivera e Palmás rozaron o segundo gol, aínda que sen éxito.
O 1-0 inicial mantívose ata o asubío final, certificando o pase do Arousa SC aos cuartos de final, onde se medirá ao Coruxo CF, de Segunda RFEF, que superou o Gran Pena na outra eliminatoria.