Partido de contrastes e vaivéns o que realizou o Arxil na súa visita á pista do líder e intratable polo momento Ao-Qázeres. As de Mayte Méndez comezaron moi ben, logrando unha mínima renda (8-12) aos catro minutos de xogo, pero pronto as locais reaccionarían dando un primeiro estirón para levar a parcial inicial (24-18).
A igualdade presidiría o segundo cuarto, cun Arxil que non perdía a cara ao partido. As cacereñas poñíanse 16 arriba (38-22), pero o equipo pontevedrés reaccionaría ata chegar a situarse a só seis puntos (38-32), cedendo tamén o segundo parcial (16-14) para retirarse aos vestiarios cunha desvantaxe de só oito puntos (40-32).
Pero o afundimento chegaría ao regreso de vestiarios. Ao-Qázeres pisou a fondo o acelerador e en só catro minutos puxo a diferenza en +15 ao seu favor (53-38). Arxil non reaccionou e as locais seguiron machucando o aro pontevedrés ata conseguir a máxima diferenza ata entón do partido (64-40), para pechar o parcial nun contundente 24-8 que deixaba o partido resolto.
Por se queda algunha dúbida, no período final a diferenza iríase ata os 25 puntos (73-48), a falta de algo menos de cinco minutos, momento en que o Arxil aproveitou a lóxica relaxación estremeña para asinar un bo final de partido e maquillar o resultado, impoñéndose no parcial (14-26) ata ese 78-66 final.
María González Centeo (21 puntos, 7 rebotes e 24 de valoración) foi a mellor xogadora do Arxil, ben secundada por Ana María Román (13 puntos, 4 rebotes e 19 de valoración).