A canteira do atletismo pontevedrés ha marabillado ao público no campionato de España sub18 que se celebrou en Castelló.
Até alí, entre outros, trasladáronse seis atletas da Sociedad Gimnástica de Pontevedra cuxos resultados, segundo o club, non puideron ser mellores.
Sabela Martínez volveu a Pontevedra coa medalla de prata na proba de 800 metros, onde ademais da segunda praza asinou a súa mellor marca persoal, 02:10.09.
A súa non foi a única medalla para a Gimnástica, xa que María Estévez colgou o bronce no 2.000 obstáculos, onde tamén bateu a súa marca, agora en 06:54.10.
Pola súa banda, Paula Fernández foi cuarta no 3.000, a só tres segundos do bronce, mentres que Guille Piñeiro acabou sexto na final de 110 metros valas.
A eles sumáronse Alejandro Santos, noveno nos 3.000 metros lisos e Isaac Casal, décimo terceiro na proba de triplo salto.
BRONCE PARA O AROUSÁN ÁLEX CÉSAR
Pola súa banda, a Agrupación Atletica MAZI de Vilagarcía regresou de Castelló cunha medalla de bronce, a que logrou Álex César no lanzamento de xavelina, sobrepóndose ao forte vento da xornada.
O seu mellor lanzamento chegou até os 58.64 metros que, aínda que está lonxe dos 66 metros dos que partía, garantíronlle a terceira praza na competición nacional.