Novo éxito nacional para o Club de Remo Ría de Marín grazas a unha das súas maiores promesas como é Alejandro Estebánez, que finalizou terceiro na categoría infantil do Campionato de España alevín, infantil e veterano.
O remeiro do club marinense viaxou até o Centro Especializado de Alto Rendemento (CEAR) Isla de La Cartuja (Sevilla) para medirse aos mellores do panorama nacional nunha cita marcada polas altas temperaturas propiciadas pola onda de calor que azoutou a todo o país esta fin de semana.
A esixencia da cita foi maiúscula, pois acudiron un total de 372 embarcacións de 62 clubs procedentes de 11 comunidades autónomas cunha participación récord que superou o milleiro de deportistas (631 remeiros e 444 remeiras).
Pero Alejandro soubo brillar neste contexto de máxima dificultade, pois asinou unha destacable actuación na categoría Skiff Infantil Masculino que lle serviu para colgarse a medalla de bronce na gran final.
De feito, esta proba foi máis especial si cabe debido á presenza doutro remeiro do club como é Rubén Sobral, que terminou nunha meritoria sexta posición e demostrou o gran nivel da canteira da entidade marinense.
En canto ao resto de representación do Club de Remo Ría de Marín cabe destacar a Mauro Fernández e Johel Bangueses, que competiron na categoría de Dobre Scull e pelexaron até o último segundo a pesar de non lograr a clasificación para as finais.
Completou a representación do club Fabián Fernández, que se estreou na categoría alevín deste campionato nacional cun meritorio duodécimo posto.
Esta medalla de bronce para o Club de Remo Ría de Marín únese ao éxito colectivo do remo galego, que terminou a fin de semana con cinco dos seus clubs nos postos honoríficos do medalleiro nacional de base. O primeiro posto foi para un dominador Club Náutico de Sevilla.