Seis puntos de vantaxe sobre o segundo e só oito por disputar. O Cisne acaricia o título de campión de liga tras impoñerse ao Calvo Xiria con moitos apuros, remontando na recta final nun partido tenso, duro e complicado.
Os de Carballo non se xogaban nada, pero acariciaron a sorpresa mantendo a iniciativa no marcador ata os últimos seis minutos de partido, ante un Cisne agarrotado, pero que soubo reaccionar a tempo para evitar que os puntos voasen do pavillón do estadio.
Pronto se viu que a vitoria ía estar cara. Con curtas vantaxes no marcador, os visitantes despegábanse xusto antes do descanso, para retirarse ao vestiario cun inquietante 11-15 (máxima diferenza do partido) ao seu favor.
Na reanudación o Cisne saíu máis entoado, aínda que seguía sendo incapaz de parar o acerto de Pablo Iglesias, autor de máis da metade dos goles do seu equipo. Os de Edín Covelo conseguían empatar por primeira vez (21-21) no minuto 54, por medio de Iván Abilleira. Logo marcaría Andrés Sánchez, pero Calvo Xiria non se rendeu conseguindo entrar no último minuto a só un gol por debaixo (24-23). Javi Vázquez levaría a tranquilidade á bancada, a falta de tan só 23 segundos para o final.
BM CISNE (25): Toño Lafuente, Pablo Galán, Santiago Cuenca; Iván Abilleira (2), Pepe Camiña (1), Álex Chan (5), Edu Covelo (1), Rafa Dasilva (1), Bruno Montesinos (3), Pablo Picallo (1), Andrés Sánchez (7), Miguel Simón, Javi Vázquez (4) e Pablo Vidal.
CALVO XIRIA (23): Martín Gómez, Alejandro Naya; Alfeirán (2), Jorge Bouzas, Calvete, Sergio Facal (1), Fraga, Mario, Pablo Iglesias (12), Lema (2), Julián López, Méndez (2), Gonzalo Pombo (1), Brais Puñal (2), Javier Rodríguez (1) e Iván Campos.
Árbitros: Pablo Castellanos García e Luis Vázquez De Prada Bravo (Castela e León). Excluíron por dous minutos a Edu Covelo, Santi Cuenca e Miguel Simón (2), polos locais, e a Jorge Bouzas, Sergio Facal, Lema, Méndez, Brais Puñal e Javier Rodríguez, polos visitantes.
Marcador (cada cinco minutos): 1-3, 4-5, 5-8, 8-10, 9-12, 11-15 (descanso), 15-16, 16-19, 18-19, 19-20, 22-21 e 25-23 (final).
Incidencias: Pavillón do CGTD (Pontevedra). Uns 150 espectadores.