Frío pero cun asollado día. Con eses ingredientes, perfectos para a práctica deportiva a principios de xaneiro, o Centro Galego de Tecnificación Deportiva de Pontevedra viviu este martes 5 de xaneiro unha xornada de festa.
A pista de atletismo da instalación pontevedresa foi escenario do III Torneo de Reis organizado polo Club Atletismo Rías Baixas, coa honra de ser a primeira cita da tempada nacional ao aire libre.
Máis de 200 deportistas de todas as categorías, desde a base ata os máster, déronse cita no evento.
O Torneo comezou ben cedo, ás 10.00 horas da mañá, e fíxoo cunha proba cun toque de nostalxia, os 3.000 metros feminino no que participaba unha das mellores atletas galegas da historia, Julia Vaquero, estreándose na categoría máster.
Era unha nota de cor para unha xornada que se desenvolveu con éxito ata o mediodía, nunha gran maneira de iniciar o ano deportivo na cidade.