As augas do Río Guadalquivir, en Sevilla, foron testemuñas durante a fin de semana dun festival do piragüismo galego e tamén pontevedrés no Campionato de España de Xóvenes Promesas.
O título por equipo foi para o Náutico de Pontecesures con 2.303 puntos, quedando moi preto a Escuela de Piragüismo Ciudad de Pontevedra, que se fixo co subcampeonato nacional con 2.236 puntos mellorando o terceiro lugar conseguido en 2016.
Fíxoo o club pontevedrés grazas a un equipo con 28 padexeiros dos que seis subiron ao podio. Así, Antía Otero conseguiu a primeira posición na categoria C-1 infantil A con Ángela Jorge segunda, Alejandra Manso venceu na proba K-1 cadete B, Lucía Graña fíxose coa prata no C-1 infantil B, María de la Peña foi segunda no C-1 cadete e Ángel Fuego foi bronce tamén no C-1 cadete.
"A nosa actuación neste campionato foi impresionante. Sabiamos que había nivel, pero sempre é unha sorpresa conseguir estar entre os tres primeiros postos a nivel nacional", declarou tras o campionato o presidente do club, Óscar Ponte.
Pero non foi o único club pontevedrés con actuación destacada. Se o Ciudad de Pontevedra foi segundo do medalleiro (dous ouros, dúas pratas e dous bronces), o terceiro posto nesta clasificación foi para o Club Piragüismo Verducido Pontillón grazas a dúas medallas de ouro, as conseguidas por Raquel Torres no K-1 cadete e Anxo García no K-1 infantil.
En canto ao resto de resultados de deportistas da comarca, destacou o canoista Manuel Fontán (Náutico O Muiño) ao levar a medalla de ouro na categoría cadete A, despois de dominar toda a regata e chegar a meta cun minuto de vantaxe sobre o segundo clasificado.