O derbi galego da Liga Asobal entre Dicsa Modular Cisne e Frigoríficos do Morrazo Balonmán Cangas, previsto para este sábado 20 de febreiro no Pavillón Municipal dos Deportes de Pontevedra, terá que esperar.
O Comité de Competición aceptou a solicitude do conxunto local, o Cisne, de aprazar o encontro debido ao gromo de covid detectado con ata tres dos seus xogadores positivos.
Tras detectarse o primeiro caso horas antes de enfrontarse ao Granollers, o club cisneísta pasou a estar en confinamento salvo un par de excepcións de xogadores que superara a infección recentemente, o que provocou tamén a suspensión do choque fronte a Ademar León.
Agora, a pesar de que a maior parte do grupo cumprirá este mércores 17 de febreiro os 10 días de illamento, segue sen saberse con exactitude cando se poderán retomar os adestramentos ao estar á espera de novas probas e resultados, polo que tras dúas semanas parados Competición atendeu a petición pontevedresa.
"Estamos á espera de acordar co club cangués unha nova data para a celebración do derbi", confirmou en redes sociais o propio Cisne, que espera esta sexa a última xornada que se apraza polo gromo detectado podendo retomar a normalidade a partir da próxima semana.
APLAZAMIENTO | Ya es oficial...El Comité Nacional de Competición de la @RFEBalonmano aplaza el derbi ante el @balonmancangas previsto para este próximo sábado 20. Estamos a la espera de acordar con el club cangués una nueva fecha para la celebración de #ONosoDerbi #SomosCisne pic.twitter.com/mJzNuU1H2X
— DICSA Modular Club Cisne Balonmano (@ClubCisneBalonm) February 16, 2021