Cristian Fernández, décimo terceiro no Mundial de Acuatlón: "Grazas ao público, acabei a carreira"

Era a gran esperanza local no Campionato do Mundo Multideporte de Pontevedra, pero Cristian Fernández quedou sen opcións de pelexar polos metais na modalidade de acuatlón.

A proba, celebrada na tarde deste venres, congregou a numeroso público nas inmediacións da Ponte dos Tirantes e do CGTD, que acudiu a apoiar ao deportista de Poio.

Con todo, a pesar dos ánimos que recibiu, 'Tianillo' non atopou a maneira de sobreporse ao ritmo dos seus rivais e terminou cruzando a meta en décimotercer lugar cun tempo de 00:30:15.

"Foi un desastre. Non se que pasou na saída, foi algo rarísimo. Nin me decatei de que deron a saída. Ao principio houbo moitos golpes e tiven que pelexar para colocarme diante e, aínda que conseguín saír terceiro da auga, a carreira custoume. Foi unha pena", lamentou unha vez acabou a carreira.

O que foi adestrador do Club Natación Galaico até a pasada tempada recoñeceu tamén que chegaba 'tocado' á cita e sabía que a carreira a pé íalle a custar, "pero custoume o dobre o que pensaba. Grazas ao público, acabei a carreira", afirmou.

En canto á proba, o gañador foi o húngaro sub-23 Márton Kropkó quen, cun tempo de 00:28:15, fíxose cos ouros absolutos e sub-23. Por detrás, o español Damián Suárez (00:28:20), quedou coa prata absoluta e o ouro júnior, mentres que a inglés elite Christopher Perhan (00:28:38) foi terceiro.

A representación española nesta proba foi destacada co cuarto posto no xeneral da elite Kevin Viñuela (00:28:55) e o quinto do sub-23 Julen Andueza (00:28:58).

Dentro do top-10 tamén entraron o sub-23 Raúl Gómez (sétimo), o júnior Lucas Riola (oitavo) e o sub-23 Alejandro Pla (noveno).

Na proba feminina, a rusa Hanna Maksinava impúxose cun tempo de 00:32:57 sobre a española Mariña Muñoz (00:33:03), quen quedou coa prata elite, e sobre a húngara Jázmnin Kropkó (00:33:04), quen foi terceira, levándose tamén o ouro júnior.

España tamén tivo destacada representación co cuarto posto da elite Gemma Llabrés (00:33:06) e o sexto da júnior Lucía Castelló (00:33:45).

Consulta todos os tempos neste enlace