A xornada do Campionato do Mundo de Dúatlon Cros celebrada este xoves en Verducido, dentro do Mundial Multideporte Pontevedra 2025, deixou un sabor especialmente doce para a delegación española grazas ao dobre ouro conseguido en categoría júnior por Manuel Prada e Julia Tenorio.
Prada, quen xa se coroou campión mundial por substitucións mixtas 2x2 o pasado domingo, completou unha brillante remontada para alzarse co título.
Pola súa banda, Julia Tenorio protagonizou un intenso duelo coa súa irmá María, quen finalmente levou a prata nunha chegada moi axustada. O podio júnior feminino completouno a italiana Serena Bratti.
En categoría absoluta, o dominio belga foi incontestable na competición masculina, colocando a tres dos seus representantes entre os catro primeiros clasificados.
Thibaut De Smet proclamouse campión cun tempo de 1h32:50, avantaxando en case dous minutos ao seu compatriota Sebastien Carabin, mentres o francés Arthur Forissier completou o podio. O mellor español foi Sergio Correa, que finalizou en undécima posición.
Na proba feminina, a suíza Anna Zehnder impúxose con autoridade (1h49:58) sobre a italiana Noemi Bogiatto, quen quedou coa prata absoluta e o ouro sub-23. A australiana Laura Gillard foi terceira, levándose ademais a prata sub-23.
España tamén tivo representación destacada con María Sánchez como quinta clasificada, mentres que Zoila Sicilia logrou o bronce en categoría sub-23.
O Mundial Multideporte continuará este venres 27 coa disputa do Campionato do Mundo de Acuatlón nunha proba espectacular no río Lérez.
O domingo pecharase o evento co prato forte: o Mundial de Tríatlon de Longa Distancia e o AquaBike.
Todos os resultados poden consultarse neste enlace do Multisport e o calendario das probas figuran nesta web.