O Cuatro Caminos frea o Waterpolo Pontevedra en Rías do Sur

E chegou a derrota para o Club Waterpolo Pontevedra.

No primeiro partido da segunda volta da primeira fase da Primeira Nacional Feminina, o conxunto pontevedrés sufriu o seu primeiro tropezo do curso ante un rival directo, o CN Cuatro Caminos, único equipo ao que non lograra vencer no tempo regulamentario durante toda a primeira volta.

O equipo madrileño chegaba a Pontevedra coa ambición de acurtar distancias na táboa (ocupaba a segunda posición a cinco puntos do líder e só dúas derrotas), e cumpriu o seu obxectivo cunha actuación moi sólida en todas as facetas.

O inicio foi equilibrado, con alternancia de goles e un marcador que reflectía a igualdade entre os dous mellores equipos do grupo. Con todo, na recta final do primeiro cuarto, o Cuatro Caminos conseguiu tomar a primeira vantaxe e pechou o parcial cun 2-4.

O Waterpolo Pontevedra tratou de remar antes do intermedio, pero non lograron dar coa clave para superar a barreira defensiva do rival, que mantivo a súa portaría a cero durante todo o período e abriu unha nova brecha até o 2-6 co que se chegou ao descanso.

Tras o paso polos vestiarios, o panorama non mellorou para o cadro pontevedrés. A pesar dos intentos por recortar distancias, o Cuatro Caminos soubo xestionar a súa vantaxe e mantivo o control do ritmo para castigar cada erro local. Ao termo do terceiro cuarto, o marcador reflectía un 6-11 que deixaba o partido practicamente sentenciado.

No último acto, o Waterpolo Pontevedra non baixou os brazos e seguiu loitando até o final, pero non logrou facer dano ao equipo madrileño, que pechou o partido cun 8-14 que aperta a parte alta de clasificación.

A pesar da derrota, as de Lérez seguen líderes da táboa con 20 puntos, a dous do CN Cuatro Caminos e do Club Waterpolo Elx.