O Pontevedra Club de Fútbol céntrase xa no próximo partido de liga, todo un encontro entre primeiro e terceiro clasificado ao visitar o Zamora o Estadio Municipal de Pasarón (domingo 25, 17.00 horas).
"É un partido máis", asegurou este mércores en rolda de prensa Dalisson de Almeida aínda que recoñecendo que "todos sabemos que é moi importante".
O é porque un triunfo "é clave para distancialos", afirma, xa que o conxunto zamorano quedaría a 6 puntos dos granates e co average perdido.
Por ese motivo todo apoio será importante, e para o 18 do Pontevedra "creo que o factor campo vai axudar moitísimo". De feito "gustaríame facer un chamamento", sinalou cara á afección pontevedresa augurando que "o domingo vai ser un partido súper bonito de ver".
Dalisson espera, iso si, un rival que "é un gran equipo, e que supoño que nos terán un pouco de rancor pola ida. É un equipo duro, xoga directo e atrás concede moi pouco", analizou ante os medios de comunicación.
Dio un futbolista que ata o de agora foi fixo nos plans de Yago Iglesias, titular en todas e cada unha das 23 xornadas disputadas, o que lle fai sentirse "importante" no equipo, tanto se xoga máis pegado a banda como contra o Coruxo ou nunha zona máis interior. "Síntome máis cómodo xogando por dentro, pero ficháronme como extremo e tamén estou cómodo por fóra", afirmou disposto a xogar onde lle requira o seu adestrador.