Os espectaculares números de Maimouna Diarrá fan que o Arxil, malia a súa axustada derrota na casa do líder Ensino, mire con optimismo o tramo final da tempada, no que espera confirmar a súa presenza no play-off de ascenso á máxima categoría.
Para iso será importante repoñerse canto antes do último tropezo cun triunfo na casa ante o difícil Aros de León (CGTD, sábado 19:30 horas). Conscientes desa dificultade a directiva verde solicitou o apoio dos seus afeccionados para un choque que pode ser decisivo para manterse na terceira praza.
Como decisivo será que Diarrá manteña o seu nivel. A senegalesa, tras a última xornada, pasou a liderar o ranking de anotadoras do Grupo A da Liga Feminina 2, ao que se une o seu liderado en rebotes, tapóns e valoración.
Números de auténtica MVP que se traducen en 20,21 puntos, 13,93 rebotes e 1,86 tapóns por partido, cunha valoración media de 27,14.
O rendemento da pívot non pasou desapercibido para o seleccionador de Senegal, que estivo estes días en Pontevedra comprobando o estado de forma da xogadora e coñecer a súa dispoñibilidade para a Copa de África que se disputará o próximo verán.