A tempada 2024/2025 chegou ao seu fin da mellor maneira posible para o Poio Pescamar B.
O filial conserveiro pechou o curso cun histórico dobrete despois de proclamarse campión da Copa tras imporse ao Marín Futsal B por 1-3 na final.
A gran protagonista do encontro foi Sofía Rozas, quen asinou un hat-trick para selar a vitoria do seu equipo.
Este fito chega despois do seu recente debut en Primeira División, do mesmo xeito que a súa compañeira Iria Tilve, demostrando a calidade da canteira do equipo da Seca.
Este triunfo na Copa pon o broche de ouro a unha tempada inmellorable para o vestiario dirixido polo tándem Bea Mateos e Ale de Paz.
No pasado mes de marzo, o equipo xa se proclamou campión de Liga, o que supón o ascenso a Preferente, división que o filial recupera tras dous anos de ausencia.
Coa consecución desta Copa, o Sénior Feminino B repite o título copeiro que xa conquistara a pasada campaña.
Desta forma, as súas dúas tempadas nesta división péchanse cun balance excepcional de tres trofeos de catro posibles, confirmando o gran traballo e a progresión deste mozo e prometedor equipo.