As augas de Portonovo e Sanxenxo acolleron este sábado a regata inaugural da quinta edición da Copa Mörling, o Campionato Galego de Dornas a Vela.
Fixérono baixo a celebración da XVII Regata do Sepelo, que comezou ás 16:30 tras a reunión de patroas e patróns das embarcacións que decidiron acurtar o percorrido debido ao escaso vento, factor que dificultou a navegación. Deste xeito, as vinte dornas participantes deron unha soa volta ao circuíto en lugar de completar as dúas que estaban previstas.
Esta primeira proba puntuable da competición saldouse coa sorprendente vitoria da dorna 'Fungona', embarcación da Asociación Dorneiros Regateiros de Cambados.
En segundo lugar terminou 'Abuelo Tucho', do Clube Mariño Salnés, e pechou o podio a gran favorita e catro veces campioa, a 'Pereka' da Asociación Cultural e Deportiva da Illa de Arousa.
Tras finalizar a regata, a Asociación de Amigos de Dorna de Portonovo exerceu como primeira anfitrioa xunto á organizadora principal Cultumar e celebrou unha xornada de convivencia destinada ás tripulacións e os participantes. Este costume vaise levar a cabo ao finalizar cada unha das cinco regatas da competición.
A Copa Mörling desenvolverase ao longo do verán e celebrará a súa segunda regata o vindeiro sábado 20 de xuño en Cambados baixo a IX Regata do Salnés, organizada polas asociacións A Torre e Dorneiros Regateiros.
O circuíto chegará ao seu ecuador o 27 de xuño coa celebración do Triángulo do Cantiño en A Illa de Arousa e encarará a recta final en O Grove coa Regata de Dos Faros o 4 de xullo.
Todo se decidirá, por tanto, na última proba do calendario fixada o día 22 de agosto. Será na Regata de Reiboa en Combarro, Poio.