Un domingo díficil de esquecer o vivido este 12 de abril en Pasarón polo Pontevedra Club de Fútbol, polo gran nivel mostrado polo equipo granate fronte á Ponferradina, pero sobre todo para un dos seus xogadores, Alain Ribeiro.
Reconvertido por un día a dianteiro, o futbolista vasco respondeu á confianza depositada por Rubén Domínguez cun decisivo hat-trick, marcando tres tantos. A primeira vez que o consegue na súa carreira.
"Estou alucinando, non fixera un hat-trick na miña vida", recoñecía aínda sen crelo desde a sala de prensa de Pasarón e co balón asinado polos seus compañeiros na man, a modo de trofeo.
Con eses goles Alain, que esta tempada foi un auténtico multiusos xogando en diversas posicións na medular e ata de central zurdo, alcanza ademais con 9 tantos a maior cifra realizadora de toda a súa carreira, superando os 8 logrados o pasado curso en Segunda RFEF co Numancia.
Ribeiro rompe tamén unha seca de dous anos e medio sen que a afección pontevedrésa vivise un hat-trick dun dos seus. O último en logralo fora Rufo na segunda xornada da tempada 23-24, no mes de setembro de 2023, nun 6-0 contra o Langreo.
O propio Rufo sumou outro triplete coa granate en 2020, fronte ao Real Madrid Castilla. Ademais na lista de xogadores do Pontevedra que o lograron no que vai de século aparecen nomes ilustres como o de Yuri de Souza (outubro de 2005 contra o Negreira e en xaneiro de 2007 nun 5-1 sobre a Orientación Marítima) ou Charles Dias (ao Alcorcón en abril do 2006 cun 3-1 en de febreiro do 2010 contra o Lugo nun 2-4 no Anxo Carro.
Nos anos dos granates en Terceira División máis futbolistas sumáronse a esta honra, mesmo cun 'póker' de Jorge Rodríguez nun 0-8 fronte ao Bertamiráns en 2015 ou Jacobo Millán nun 5-0 fronte ao Narón en febreiro do 2013. Ademais, Tubo conseguiu un triplete contra o Betanzos na campaña 12-13 e Yago contra As Pontes na 11-12.
ALAIN PIDE Á CIDADE QUE SE ENVORQUE CO EQUIPO
Co Pontevedra de novo en postos de play-off a só seis datas do final da liga regular en Primeira RFEF, o protagonista da xornada en Pasarón aproveitou para pedir á cidade que se envorque con eles para tentar lograr algo inimaxinable ao comezo de tempada.
"Estamos moitos equipos en moi poucos puntos e creo que vai ser un ano moi chulo. É momento para que toda a cidade se envorque co Pontevedra, que una a súa garganta para unirse ao obxectivo e remar todos na mesma dirección", defendeu o futbolista.
"Ninguén conta connosco para estar entre o cinco primeiros e nós esa rabia imos aproveitala", defendeu ante os medios de comunicación.
Engade Pontevedra Viva como fonte preferida de Google de balde
Mantente informado coas últimas noticias de actualidade.