Bea Gómez Cortés colgouse dúas novas medallas no Campionato de España de Inverno, que se disputa estes días en Castellón.
A nadadora pontevedra só foi superada por Mireia Belmonte (4.30.01) nuns 400 metros estilos nos que bateu ademais o récord galego (4.35.91) para finalizar segunda e sumar a súa segunda medalla de prata, repetindo o resultado dos 200 libres do venres. Completou o podio a riveirense Maria Vilas (4.36.34).
Bea redondeou a xornada cunha medalla de bronce nos 400 libres (4.04.92) coándose no podio xunto á propia Mireia Belmonte (3.58.45) e Melanie Costa (4.02.23), dúas deportistas que esta tempada sumaron 41 medallas entre ambas na Copa do Mundo.
Na mesma proba, os 400 libres, a tamén nadadora do Galaico, Iria García, finalizou no vixésimo primeiro lugar cunha marca de 4.23.67.
Para finalizar a competición este domingo, na terceira e última xornada do Nacional de Piscina Curta, Bea Gómez disputará aínda dúas probas, os 100 libres e os 200 estilos, esta última xunto á súa compañeira de club Paula Goyanes, mentres Iria García tomará a saída nos 800 libres.