A Sociedad Deportiva Teucro estase a apurar na configuración do equipo de cara á próxima tempada na División de Honra Prata.
Se a semana pasada se confirmaba a primeira fichaxe, de Dani Hernández, este luns o club azul anunciou o acordo con dous xogadores máis, Eduardo Moledo e Santiago Gómez.
O primeiro deles, Moledo, é un extremo dereito de 27 anos que ao igual que Hernández procede do Academia Octavio vigués, onde estivo ás ordes de Quique Domínguez.
Edu é natural de Cangas e a pasada tempada disputou no Octavio 13 partidos nos que marcou 51 goles.
Pola súa banda Santiago Gómez chega a Pontevedra dende o Calvo Xiria de Carballo, que a pasada tempada disputou o Primeiro Nacional, e é o primeiro dos dous gardametas que pretende incorporar o Teucro.
Segundo os plans do técnico azul, aínda se tratará de fichar polo menos a outro porteiro e a un pivote antes de dar por pechado o plantel.
Moledo será presentado este martes no Pavillón Municipal dos Deportes.