Empate do Pontevedra co Celta Fortuna nun derbi de máxima igualdade

Pontevedra Club de Fútbol e Celta Fortuna protagonizaron este sábado no Municipal de Pasarón un gran partido que se saldou cun punto para cada equipo (1-1). Adiantáronse os granates no minuto 30 a través de Facu Ballardo e Óscar Marcos devolveu a igualdade ao bordo do descanso.

Rubén Domínguez apostou por un once inicial con destacadas variacións respecto da xornada pasada. Marqueta partiu en portaría cunha defensa formada por Miki Bosch e Montoro, con Vidorreta no lateral dereito e Miguel Cuesta no esquerdo. Yelko e Facu actuaron na medular con Alain na mediapunta, as bandas foron para Diego Gómez e Alberto Gil e Compa foi a referencia en ataque.

Ambos os equipos trataron de facerse coa posesión nun inicio de partido dominado maiormente polo conxunto granate. As primeiras chegadas con perigo foron precisamente dos lerezanos, que puideron adiantarse no minuto sete nunha perda de balón de Dela que Yelko non aproveitou por moi pouco.

Apenas un minuto despois tívoa Compa nun saque de esquina, pero o seu remate foi rexeitado pola zaga celeste. A réplica da Celta Fortuna non se fixo esperar cun disparo de Óscar Marcos que Marqueta detivo sen complicacións.

Nun primeiro tempo sen demasiadas ocasións, as individualidades de Diego Gómez no perfil destro foron o máis destacable dun Pontevedra que, aos poucos, tratou abrir ocos na defensa do filial vigués.

O balón parado volveu xogar a favor do equipo de Rubén Domínguez. Yelko puxo un saque de esquina no minuto 30 que Miki Bosch rematou no segundo pau, Coke parou in extremis e o despexe caeu morto no punto de penalti. Apareceu entón Facu Ballardo para rematar a pracer e pór o 1-0 no marcador.

A xogada foi revisada por Jaime Ruíz por un posible fóra de xogo posicional de Compa no remate de MIki. O asturiano mantivo a decisión do seu asistente e deu validez ao tanto.

Co encontro controlado e apunto de chegar ao descanso, Óscar Marcos aproveitou unha perda de Miki Bosch na frontal da área para bater a Marqueta cun disparo axustado ao pau longo. Igualdade no marcador unha vez superados os primeiros 45 minutos.

Ningún dos dous equipos saíu cos mesmos protagonistas, pois Rubén Domínguez deu entrada a Eimil por Alberto Gil e Fredi apostou por Milla para dar saída a Oliveras.

O partido abriuse no inicio do segundo tempo e ambos os equipos apostaron por ataques máis verticais. Eimil deu profundidade aos locais na banda dereita e Diego Gómez, que continuou sendo moi incisivo, tivo a primeira cun disparo desde o bordo da área que se foi desviado.

Unha transición ofensiva do Celta Fortuna por banda dereita meteu en problemas ao conxunto lerezano. Somuah gañou as costas a Montoro e plantouse diante de Marqueta, que detivo o seu disparo cun gran pé.

Rubén López entrou ao campo a media hora do final para suplir ao goleador da tarde, Facu Ballardo.

A falta de 20 minutos para o final protagonizou Diego Gómez unha boa internada pola dereita. Óscar Marcos derrubou ao xogador cun empuxón e o colexiado asturiano non sinalou nada. Os granates pediron unha revisión en balde, pois a decisión se mantivo.

Animáronse aos poucos os granates, que axexaron a portaría de Coke Carrillo cando o encontro se encamiñaba aos seus últimos dez minutos. Tamén tivoa o Fortuna nun man a man de Burcio que Montoro corrixiu xusto a tempo.

Tívoa tamén Angel Arcos cun disparo afastado que Marqueta desviou con acerto a saque de esquina. A balanza podía caer cara a ambos os bandos nun trepidante final de partido.

Con todo, a máis clara do segundo tempo chegou no minuto 84 nunha gran transición de Joao Resende. O portugués atopou só a Diego Gómez dentro da área e o xogador cedido polo Depor mandou o seu disparo desviado por moi pouco.

Pese ao arreón final do Pontevedra o encontro chegou ao seu fin con 1-1 no marcador. Este punto mantén ao conxunto lerezano en postos de play-off.

Os de Rubén Domínguez son temporalmente terceiros con 53 puntos a falta de catro xornadas. A próxima semana haberá un novo derbi galego na Malata fronte ao Racing Club de Ferrol

PONTEVEDRA CF (1): Marqueta, Miki Bosch, Alain Ribeiro (Joao Resende, min. 69), Yelko, Miguel Cuesta (Álex González, min. 82), Facu (Rubén López, min. 61), Vidorreta, Alberto Gil (Víctor Eimil, min. 46), Diego Gómez, Compa e Montoro.

CELTA FORTUNA (1): Coke Carrillo, Anxo Rodríguez (Ángel Arcos, min. 60), Meixús, Quique Ribes, Gavián, Hugo Burcio, De La Iglesia (Capde, min. 60), Jan Oliveras (Milla, min. 46), Somuah (Kibet, min. 77), Marín (Jorge, min. 82) e Óscar Marcos.

Goles: 1-0, Facu Ballardo, min. 30. 1-1, Óscar Marcos, min. 45+1.

Árbitro: Jaime Ruíz (Asturias), auxiliado nas bandas por Sergio Martín e Pelayo Burgo, con Carlos Fernández como cuarto colexiado. Amoestou a Diego Gómez (70´) por parte do Pontevedra e a Anxo Rodríguez (19´), Óscar Marcos (67´) e Meixus (89´) na Celta Fortuna.

Incidencias: Partido correspondente á xornada 34 do grupo I de Primeira RFEF disputado no Municipal de Pasarón diante de 6.673 espectadores.