deportes

O Fabril-Pontevedra xogarase en Riazor

Pontevedra
27 de xaneiro 2025
Diego Espiño

O Deportivo decidiu trasladar o encontro do seu filial co Pontevedra ao Estadio Abanca-Riazor, o que abre a posibilidade dun maior desprazamento de afeccionados granates

Partido de Primeira RFEF entre o Deportivo e o Pontevedra en Riazor
Partido de Primeira RFEF entre o Deportivo e o Pontevedra en Riazor / Mosrey Fotografía

O Estadio Abanca-Riazor será finalmente o escenario do partido de liga de Segunda RFEF entre Fabril e Pontevedra Club de Fútbol.

O Deportivo decidiu cambiar de escenario o encontro do seu filial, que habitualmente xoga na cidade deportiva de Abegondo, e abrir o seu estadio para o derbi, o que ofrece a posibilidade a un maior desprazamento de afeccionados granates.

O duelo disputarase o vindeiro domingo 2 de febreiro ás 12.00 horas.

En anteriores tempadas o feito de xogar en Abegondo limitou a presenza de seguidores pontevedreses para poder garantir o acceso aos socios do equipo local.

Non será así nesta ocasión, ofrecendo unha gran posibilidade para que se mobilice a 'Marea Granate'.

Así o viu tamén o Pontevedra, que confirmou a organización dun desprazamento en autocar para presenciar o partido.

Tamén se poderá acudir ao mesmo comprando a entrada xeral (10 euros) até o xoves nas oficinas do Pontevedra e a partir do mércores na páxina web do RC Deportivo, ao estar limitada a venda online até entón a socios do club coruñés.

O autobús de afeccionados, que sairá se enchen un mínimo de 45 prazas, terá un custo de 22 euros (entrada incluída), tendo prevista a súa saída ás 9.30 horas da mañá desde o Pavillón Municipal dos Deportes.

Máis novidades