O Campionato de España de Clubs de Atletismo viviu A fin de semana a súa segunda xornada de competición, unha data que definía o corte na loita polo título ou a permanencia.
Para a Sociedad Gimnástica foi unha xornada positiva, aínda que o seu equipo masculino non logrou meterse entre o oito mellores da máxima categoría, a División de Honra, e terá que pechar a súa continuidade na elite na xornada final.
Con todo os pontevedreses deron un paso importante para lograr o obxectivo, marcando distancia cos últimos postos da clasificación.
Até Barcelona tívose que desprazar o equipo masculino de División de Honra, nun encontro no que o CA Fent Camí Mislata cumpriu cos prognósticos vencendo con 229 puntos. Segundo foi Grupompleo Pamplona At. (165 puntos), terceiro a Sociedad Gimnástica (159 puntos) e cuarto o anfitrión AA Catalunya (132).
Isto deixou aos da Boa Vila na décima posición da clasificación xeral con 4 puntos acumulados (335 entre as dúas xornadas), moi preto do corte que supuña o oitavo lugar.
A nivel individual destacou en Barcelona a actuación de Daniel Chamosa nos 5.000 marcha. Non só gañou a súa proba cun tempo (19:01.54) que lle coloca como líder nacional do ano, senón que se lle outorgou o premio de mellor atleta da xornada (MVA). Gañou a súa carreira ademais nunha bonita loita con Álvaro López (19:04.72).
A Gimnástica fixo ademais dobrete nos 400 metros lisos con Oriol Madi e Alexis Miguens, e tamén logrou un triunfo parcial nos 800 metros con Pedro Osorio e na remuda 4x400. Lucas Terán foi segundo en peso do mesmo xeito que Mario Revenga no 100 valos e foron terceiros Carlos Revuelta en martelo e Abdelmonaim El Khayami no 1.500.
O EQUIPO FEMININO, NO GRUPO POLO ASCENSO
Mellor lle foron as cousas en Huesca ao equipo feminino da Gimnástica na Primeira División, cun segundo posto na súa xornada que lle permitirá pelexar polo ascenso á máxima categoría.
As pontevedresas sumaron en total 179 puntos e só foron superadas no seu encontro polo Atletismo Alcorcón (199 puntos), quedando por diante de Hiru-Herri (168 puntos) e At. Intec-Zoiti (135 puntos).
Na clasificación xeral a Gimnástica, con senllos segundos nas xornadas disputadas, pasa o corte na sétima posición.
Destacaron nas súas actuacións individuais Paula Fernández gañando os 3.000 metros e Ana Rita Mota en triplo salto e en lonxitude.
Ademais foron segundas Lara López en 400 metros, Sabela Martínez nos 3.000 obstáculos, María Estévez no 1.500, Lidya Valdés en martelo e Claudia Puig en xavelina, e terceiras Eugenia Gil no 800, Paula de la Torre no 1.500, Lucía Sánchez del Valle en 110 valos e altura, Lía Caride en 400 valos, Andrea Villaverde en lonxitude, Noa Currás en triplo salto e Gema Dacosta en peso, ademais das remudas 4x100 e 4x400.