Importante vitoria a conseguida por Jéssica Bouzas na primeira rolda do cadro principal do WTA 1000 de Cincinnati.
A tenista arousá, que caera na previa do torneo estadounidense, reenganchouse polo método de 'lucky loser' tras o abandono dunha rival, e aproveitou ao máximo a súa oportunidade logrando a que é a segunda vitoria da súa carreira nun torneo deste nivel, tras o seu periplo esta tempada no WTA 1000 de Madrid.
Bouzas estreábase na fase final de Cincinnati curiosamente ante outra 'lucky loser', a italiana e actual número 68 mundial Lucia Bronzetti.
Foi un encontro tremendamente disputado, que a galega empezou a decantar ao seu favor na primeira manga (6-4). Aínda así a súa rival igualou no segundo set (3-6) levando o duelo a unha terceira manga que se decidiu no desempate en favor de Jéssica (7-6).
Xa en segunda rolda, o seu próximo escollo cara os oitavos de final será a ucraína Elina Svitolina, número 29 de ranking WTA (chegou a ser a terceira mellor do mundo).