Primeira alegría do ano para Jéssica Bouzas e empuxón de moral para ela deixando atrás o asalto errado ao primeiro Grand Slam da tempada, o Open de Australia, no que caeu na fase previa.
A tenista arousá deixou iso atrás da mellor maneira posible, vencendo no seu primeiro torneo europeo do curso, o W75 de Porto, en Portugal.
Bouzas avanzou con autoridade no cadro ata unhas semifinais nas que remontou un resultado adverso fronte á francesa Elsa Jacquemont.
Foi un guión semellante ao da final do domingo, e é que Jéssica tivo que remar para vencer á polaca Maja Chwalinska, número 297 do ranking WTA segundo a clasificación actualizada deste luns 29 de xaneiro.
Chwalinska levou o primeiro set por 3-6, pero apareceu entón o mellor xogo da vilagarciá para responder cun contundente 6-0 e rematar na terceira e decisiva manga por 6-4.
É o décimo título do circuíto ITF para Jéssica Bouzas, tal e como destacou a Real Federación Española de Tenis para felicitala polo seu logro, e permítelle sumar uns valiosos puntos para aparecer este luns no posto 151 da clasificación mundial.