Vaia maneira de empezar o ano para Jéssica Bouzas.
A tenista arousá, xa inmersa na xira oceánica que acabará no Open de Australia, logrou este luns unha das vitorias máis importantes da súa carreira.
Bouzas venceu a estadounidense Coco Gauff, número 4 do mundo, na United Cup, competición por equipos na que representa a España.
É o primeiro triunfo de Jéssica fronte a unha Top-5 mundial, e tamén o primeiro fronte á propia Gauff, gañadora de dous grand slam na súa carreira (Wimbledon e o US Open).
A de Vilagarcía, que na xornada inaugural caera fronte á arxentina Solana Sierra, desquitouse no seu segundo encontro do ano mostrando o seu xogo máis aguerrido e impoñéndose en tres mangas por 6-1, 6-7 (3) e 6-0.
Todo iso en 2 horas e 12 minutos de xogo.
Bouzas Maneiro was ON today in her first ever top-5 win 🔥 pic.twitter.com/0dXzPPE7bm
— United Cup (@UnitedCupTennis) January 5, 2026
"Estou moi contenta por esta vitoria, por como xoguei. Coco é unha tenista incrible contra a que sabía que tería que estar sempre aí, en todo momento", afirmou tras o partido disputado en Perth a propia Jéssica Bouzas en declaracións á televisión oficial da United Cup.
Un triunfo que "me dá moita confianza porque se trata de gañar a unha das mellores do mundo e vexo que o meu nivel está aí", afirmou no inicio dunha tempada na que pretende consolidarse entre as mellores xogadoras do planeta.