Acaba de finalizar a tempada 2025 e Jéssica Bouzas empeza a mirar xa cara ao 2026.
A deportista arousá, que se consolidou na elite mundial do tenis pechando a tempada desde o posto 42 do ranking WTA, iniciará 2026 con importantes retos.
O primeiro será o de liderar a España na United Cup, torneo mixto por equipos que se celebra en Australia e que serve de preparación para o primeiro grand slam do ano.
Bouzas encabezará o equipo español xunto a Jaume Munar (36), completando a selección Carlos Taberner (104) e Andrea Lázaro (182).
A United Cup vén de celebrase este luns o sorteo dunha competición que arrincará o día 2 de xaneiro.
No que respecta a España, quedou encadrada no Grupo A, con sede en Perth, xunto aos equipos de Estados Unidos e Arxentina.
Here 👏 we 👏 go#UnitedCup 2026 is SET! pic.twitter.com/XCmE1k8332
— United Cup (@UnitedCupTennis) November 17, 2025
Isto supón enfrontamentos de alto nivel, e é que no apartado feminino a selección norteamericana está comandada por Coco Gauff, actual número 3 do mundo, mentres que en Arxentina destaca Solana Sierra (66).
Para clasificarse para os cuartos de final, que se xogarían xa en Sidney, a Selección Española debería acabar como primeira do seu grupo ou ser unha dos mellores segundos.