Primeira medalla para o deporte pontevedrés no Campionato de Europa Absoluto de Taekwondo que este luns baixou o pano na cidade alemá de Munich.
Na localidade xermana un dos primeiros en entrar en acción foi o marinense Iván García na categoría de +87 quilos, na que chegaba como un dos favoritos do cadro a pesar dunha lesión que lle ofrecía dúbidas.
"Non chego nas mellores condicións porque tiven unha lesión e a recuperación non foi como eu quería, pero vou competir ao máximo e sacar o mellor de min. Cando hai un torneo deste tipo, sacas forzas de calquera sitio", recoñecía xusto antes do campionato en declaracións difundidas pola Federación Galega de Taekwondo.
O seu obxectivo, aseguraba, era "entrar nas medallas. E, coa preparación que tiven, se consigo algo máis será un agasallo", afirmaba.
O do Mat's de Marín buscaba ademais sacar a espiña de 2022 e 2024, cando caeu na final do Europeo tendo que conformarse con senllas pratas.
Iván García avanzou no cadro do torneo con autoridade gañando en oitavos de final o polaco Zbigniew Jablonski, despois o macedonio Deixan Georgievski e por último en semifinais o croata Ivan Sapina.
Así se plantou na pelexa polo título na que esperaba o británico Caden Cunningham, o mesmo que lle superou na final de 2024 en Belgrado e que se presentaba en Munich como principal cabeza de serie.
Un premio que Iván García, coa medalla xa no peto, afrontaba con ilusión. Co que non contaba era con facerse dano na súa perna esquerda no primeiro asalto da final.
O do Mat's tentou continuar, pero tras ceder no primeiro asalto e persistir a dor, tivo finalmente que abandonar poñendo fin de maneira amarga ao seu Campionato de Europa.
Fíxoo, iso si, cun subcampionato e unha prata que lle confirman na elite da súa categoría cando se achegan meses importantes no camiño cara aos Xogos Olímpicos de Los Ángeles 2028.
A participación marinense no Europeo Absoluto completaraa Sergio Troitiño na categoría de -87 quilos o vindeiro mércores 13 de maio.
Engade Pontevedra Viva como fonte preferida de Google de balde
Mantente informado coas últimas noticias de actualidade.