O Comité Técnico de Árbitros (CTA) da Real Federación Española de Fútbol deu a coñecer as designacións arbitrais para os encontros de segunda Copa do Rei que se disputarán este mércores 3 de decembro.
Entre ese choque atópase o que enfrontará ao Pontevedra Club de Fútbol e á SD Eibar no Estadio Municipal de Pasarón (21.00 horas).
Un duelo que será dirixido por un vello coñecido dos granates nunha designación canto menos curiosa.
O colexiado do encontro será o asturiano Miguel González Díaz, árbitro que afronta a súa terceira tempada consecutiva en Segunda División.
Até aí nada estraño, pero é que González Díaz é o mesmo colexiado responsable da primeira rolda da Copa do Rei dos granates a pasada campaña, tamén en Pasarón, cando eliminaron o Levante tamén da Segunda División por 4-1.
Naquel choque Miguel González expulsou por vermella directa aos 18 minutos o levantinista Navarro, nunha acción clara pero que empezou a desnivelar a eliminatoria.
Antes dese choque, xa arbitrara en tres ocasiones en anos anteriores o Pontevedra na Segunda B e na Primeira RFEF, sempre en Pasarón, cun balance total dun triunfo, dous empates e unha derrota.
Os empates producíronse contra Unionistas na tempada 20-21 (1-1) en Segunda B e fronte a Rayo Majadahonda (1-1) en Primeira RFEF na 22-23, mesma campaña que o duelo que concluíu con derrota 1-5 fronte ao Mérida.
Miguel González Díaz estará auxiliado en Pasarón por Daniel Novoa e Ricardo Landrove como asistentes e por Daniel Miranda como cuarto árbitro.