É unha das grandes referencias da loita a nivel estatal e volveuno a demostrar.
Lydia Pérez Touriño revalidou a fin de semana o seu trono nacional nos Campionatos de España Absolutos de Loitas Olímpicas e Loita Praia celebrados en Barcelona.
A deportista do Club de Loita Pontevedra logrou unha nova medalla de ouro en loita feminina na categoría de 62 quilos.
Ademais repetiu o dobrete dos últimos anos ao conseguir vencer tamén no nacional de loita-praia, neste caso nos 70 quilos.
Xunto a ela, outro deportista do club pontevedrés colgou dobre medalla.
Trátase de Ibou Faye, terceiro clasificado e por tanto bronce en loita libre olímpica (92 quilos) e prata na area da praia na categoría de +90 quilos.
En Barcelona competiu tamén Pablo García, cun cuarto posto na loita grecorromana (82 quilos) e un oitavo na competición de praia (-80 quilos).
Con estes resultados o Club de Loita Pontevedra logrou finalizar na terceira posición da clasificación absoluta feminina de loita praia.