Grandes sensacións deixou a participación de Nadia Zholtikova no Campionato de Europa U17 celebrado en Skopje, Macedonia do Norte.
A deportista do Club de Loita Pontevedra acudía á cita tras subir de peso, para competir na categoría de 53 quilos, unha máis alta que na que se proclamou recentemente campioa de España.
A pesar diso Nadia quedou no Europeo a só un paso de poder pelexar polas medallas.
Arrincou con contundencia gañando o seu primeiro combate de clasificación por 6-0 á británica Coker.
Chegou así aos oitavos de final nos que venceu de maneira traballada a búlgara Boyadzhieva (4-1).
Xa en cuartos de final, fronte á croata Kovac, co duelo moi igualado, foi sorprendida pola súa rival perdendo por tocado.
Kovac cedeu despois en semifinais, deixando á representante pontevedresa sen opción de repesca.
Unha derrota que non embaza o seu bo papel en Skopje demostrando "que pode estar entre as mellores, con carácter e esforzo", asegurou a Federación Galega de Loita sobre a súa participación no Europeo.