O Pontevedra Club de Fútbol avanza a paso firme na confección do seu plantel para o novo curso en Primeira Federación.
Tras a tripla incorporación de Jerín Ramos, Adrián Argos e Ilias Charid do pasado sábado e o anuncio de Iker Ivorra que abriu a semana, o club lerezano anunciou este mércores a fichaxe do atacante Iñaki Elejalde.
O madrileño de 27 anos aterra na cidade do Lérez para reforzar a parcela ofensiva do equipo de Rubén Domínguez. Elejalde cumpre co perfil de xogador polivalente que tanto gusta ao técnico ourensán, pois se pode desempeñar tanto no extremo esquerdo como na punta de ataque.
Formouse nas categorías inferiores do Real Madrid e do Deportivo Alavés, club co que debutou no fútbol senior na extinta Segunda B.
No verán de 2020 uniuse ás filas do filial da UD As Palmas e alí logrou debutar co primeiro equipo en Segunda División. Foi o 6 de marzo de 2021 nun duelo ante o Rayo Vallecano no que disputou 27 minutos.
Tras dúas tempadas no conxunto canario, Elejalde aterrou en Alxeciras para formar parte do cadro branquivermello en Primeira Federación, tempada na que fixo cinco goles en competición regular.
Asinou uns rexistros similares co Mérida (4 goles), club ao que se uniu no verán de 2023 antes de terminar o seu periplo pola categoría de bronce como xogador do Antequera na 24/25, campaña que tamén finalizou con catro dianas na súa conta particular.
Durante o pasado curso, o madrileño formou parte do KSC Lokeren da Challenger Prol League, segunda categoría do fútbol belga. Alí disputou 24 partidos nos que só puido anotar un gol.
Iñaki Elejalde volve a España tras a súa aventura internacional para unirse ás filas dun Pontevedra que, aos poucos, avanza na confección do seu plantel con cinco fichaxes anunciadas até a data.