Tras os grandes éxitos de Hungría e Alemaña, a armada pontevedresa viaxou este fin de semana ata Montreal para disputar a terceira Copa do Mundo do ano. E a pesar de que a competición non deixou os resultados desexados, Manuel Fontán logrou rescatar un metal para o medalleiro lerezano.
Foi na final de C2 500 xunto ao seu compañeiro, o madrileño Diego Domínguez. Xuntos formaron unha extraordinaria dupla que xa deixou un gran sabor de boca no pasado Campionato de Europa celebrado no mes de xuño. Do mesmo xeito que naquela ocasión, Fontán e Domínguez subíronse ao segundo chanzo do podio tras conquistar a medalla de prata.
Fixérono tras cruzar a liña de meta no medio de dúas embarcacións húngaras, pois en primeiro lugar e cunha mínima vantaxe de 14 céntesimas quedou a parella formada por Kristof Kollar e Istvan Juhasz.
Os españois, que terminaron a proba cun tempo de 1:37.02, si lograron terminar por diante dos outros representantes do equipo húngaro Daniel Fejes e Jonatan Hajdu.
Este resultado supón o único metal para o medalleiro pontevedrés, pois o resto de representantes non lograron subirse ao podio nas súas respectivas categorías.
Pablo Crespo terminou sexto na final de C1 1000 mentres que Carolina García e a súa parella Nerea García se impuxeron na final B de K2 500 tras non lograr un posto na loita polas medallas.
Si pelexaron polos metais Antía Jácome e Jaime Duro na xornada dominical. A lerezana foi sexta en C1 200 cun tempo de 45.99 mentres que o pontevedrés finalizou quinto en C1 5000.
No caso de Duro, trátase da primeira Copa do Mundo do 2026 no que non logra subirse ao podio tras sumar un ouro e unha prata nas dúas primeiras citas.
Engade Pontevedra Viva como fonte preferida de Google de balde
Mantente informado coas últimas noticias de actualidade.