Cuns cuantos meses de atraso pero a Sociedad Gimnástica pode presumir de medalla no Campionato de España Absoluto de Atletismo.
A Real Federación Española de Atletismo comunicou ao club pontevedrés que lle outorga a terceira posición na proba do 4x400 dentro do campionato celebrado o pasado mes de xullo en Xetafe.
Esta decisión débese á aliñación indebida do AD Marathon madrileño, segundo explicou a Gimnástica.
Desta forma a remuda formada por David Abalde, Ignacio Sarmiento, Roberto Tello e Alberto Guerrero colga 'en diferido' unha meritoria medalla cun tempo de 3:14.05, o que supuxo no seu momento récord absoluto do club nesa disciplina.
O ouro na competición nacional fora para o Playas de Castellón (3:10.62), mentres que a medalla de prata foi para a Real Sociedad (3:12.36).