Exultante, como non podía ser doutra maneira.
Así compareceu Melania Rodríguez a unha entrevista á canle oficial da Real Federación Española de Ximnasia tras a súa flamante medalla de ouro no Campionato do Mundo de Trampolín de Pamplona, na proba de dobre minitramp (DMT).
A pontevedresa conseguiu en Pamplona revalidar o título mundial conseguido hai dous anos en Birmingham, engrosando un palmarés no que tamén figura un ouro nos World Games ou o ouro Europeo logrado en 2024 en Guimarães.
Pouco queda xa por conseguir á deportista do Club Ximnasia Pontevedra no DMT, onde é unha gran figura internacional e onde posúe tamén o récord do Mundo en dificultade, pero si aparecen aínda moitos retos por diante.
"Quédanme cousas. Queda ir a uns Xogos Olímpicos, bater algun récord máis en dobre mini e facer cousas que non fixo ningunha outra ximnasta. Iso é o que eu quero facer neste deporte", afirmou Melania ao acabar a competición mundialista no Navarra Area.
Hablamos y nos emocionamos con Melania Rodríguez tras colgarse la medalla de ORO en el Campeonato del Mundo #TRAWorlds2025 🤩🕊️🇪🇸🥇 pic.twitter.com/0TjZZJz04G
— RFEGimnasia (@RFEGimnasia) November 8, 2025
Xa foi unha vez finalista mundial na modalidade olímpica de trampolín, un posto que de repetir no seu momento certificaría o soño olímpico.
Neste Campionato do Mundo con todo "a semifinal de trampolín a verdade é que non me foi nada ben, foi un pouquiño de baixón", recoñeceu á Real Federación Española de Ximnasia.
A pesar diso o balance da competición é que "non podo estar máis contenta", asegura.
Melania Rodríguez emocionouse ademais ao lembrar ao que foi durante tantos anos o seu adestrador, Pablo Hinojar, falecido a finais de 2024, e é que "era o mellor do mundo e grazas a el conseguín todo isto e son quen son", afirma a que é por méritos propios unha das mellores ximnastas do planeta.
Ademais do título na final individual de DMT, Melania conseguiu en Pamplona o bronce feminino por equipos coa Selección Española.