A moza escaladora pontevedresa Gala Teijeira Penelas, do Club Aromon de Pontevedra, ofreceu un brillante recital na mítica Copa de Escalada Urbana de Potes, unha das citas máis singulares e vistosas do calendario nacional.
Aínda que quedou fóra do desempate polas medallas, Gala protagonizou unha actuación destacada ao completar ao primeiro intento unha das vías máis difíciles e espectaculares da competición, gañándose o recoñecemento do público presente.
Aos seus 8 anos, foi unha das máis novas no muro, enfrontándose a rivais de maior idade e experiencia chegados de todos os recunchos do país
A deportista competiu na categoría infantil, que agrupaba a participantes de entre 7 e 12 anos, demostrando talento, concentración e unha progresión que promete moito futuro.
Gala quedou fascinada polo ambiente da cita deportiva celebrada no pintoresco municipio cántabro de Potes, aos pés dos Picos de Europa.