Unha semana despois de iniciar a pretempada, o Club Baloncesto Arxil segue á espera da chegada da súa fichaxe estrela, a xamaicana Yanique Gordon.
A xogadora, que procede da Universidade Central Florida da liga universitaria estadounidense (NCAA), debería incoporarse á dinámica de grupo nos próximos días, segundo as previsións do club pontevedrés, pero polo momento causará baixa no primeiro compromiso de preparación, o sábado en Vilagarcía.
O equipo verde estrearase no pavillón de Fontecarmoa (17:00 horas) en partido correspondente á Copa Galicia..
Xunto á ausencia de Gordon, Mayte Méndez tampouco poderá contar con Sandra Entenza por motivos familiares e posiblemente con Ana Román, o que minguará a capacidade competitiva do equipo.
Tras o choque de Vilagarcía, o Arxil xogará o mércores 16 en Navia ante o Celta de Vigo (20:30 horas) e o venres 18 (20:00 horas) no Centro Galego de Tecnificación Deportiva ante o Ensino lugués, ambos os dous compromisos correspondentes á Copa Galicia.
A maiores o club pontevedrés traballa en pechar un amigable a última fin de semana de setembro, que sería o último test antes do inicio da Liga Feminina 2.